'நவம்பரில் கர்நாடகாவில் அரசியல் புரட்சி நடக்கும். முதல்வர் மாற்றப்படுவார். புதிய முதல்வர் பதவியேற்பார்' என, சில அமைச்சர்களும், ஆளுங்கட்சி எம்.எல்.ஏ.,க்களும் அவ்வப்போது கூறுகின்றனர் .

'காங்கிரஸ் ஆட்சிக் காலம் முடியும் வரை, நானே முதல்வர்' என, சித்தராமையாவும் பல முறை கூறி சோர்ந்துவிட்டார். மேலிடம் எச்சரிக்கை விடுத்தும் யாரும் பொருட்படுத்தவில்லை.

லோக்சபா தேர்தல் முடிந்த நாளில் இருந்தே, முதல்வர் மாற்றம் பேச்சு அடிபடுகிறது. மேலிடம் மண்டையில் குட்டினால், சில நாட்கள் வாயை மூடிக் கொண்டு அமைதியாக இருப் பதும், அதன்பின் ஒவ்வொருவராக வாயை திறப்பதும் வழக்கமாகிவிட்டது.

நவம்பர் நெருங்குவதால், முதல்வர் மாற்றம் குறித்து, சில அமைச்சர்கள், எம்.எல்.ஏ.,க்கள் மீண்டும் பேச ஆரம்பித்துள்ளனர். வழக்கம்போல், 'சித்தராமையா முதல்வர் பதவியில் இருந்து விலகுவார். சிவகுமார் முதல்வர் பதவியில் அமர்வார். அமைச்சரவை மாற்றியமைக்கப்படும். துறையில் சாதனை செய்யாத அமைச்சர்கள் நீக்கப்படுவர். புதியவர்களுக்கு வாய்ப்பு கிடைக்கும்' என, வாய்க்கு வந்ததை கூறுகின்றனர்.

இதையெல்லாம் காதில் போட்டுக் கொள்ளாத துணை முதல்வர் சிவ குமார், கோவில், கோவிலாக வலம் வருகிறார்.

எனினும் கட்சி கஷ்ட காலத்தில் இருந்தபோது, பக்கபலமாக நின்றவர். மேலிட தலைவர்களுக்கு மிகவும் நெருக்கமானவர். கர்நாடகாவில் அதிக செல்வாக்குமிக்க தலைவர். இவ்வளவு 'பிளஸ்' இருந்தும், முதல்வராக முடியாத வருத்தத்தை அவரே பல முறை வெளிப்படையாக வெளிப்படுத்தியிருந்தார்.

இதற்கிடையே, பெங்களூரின் சதாசிவநகரில் உள்ள சிவகுமாரின் வீட்டுக்கு நேற்று முன்தினம் நள்ளிரவு, காங்., தேசிய தலைவர் மல்லிகார்ஜுன கார்கே சென்றார். இருவரும் ஒரு மணி நேரத்துக்கும் மேலாக ஆலோசனை நடத்தியுள்ளனர்.

இவ்வேளையில் சிவகுமாரிடம் மல்லிகார்ஜுன கார்கே, 'கர்நாடகாவின் அனைத்து நிலவரங்களையும், மேலிடம் கவனிக்கிறது. தேவையான நேரத்தில் சரியான முடிவை எடுக்கும். பீஹார் தேர்தல் முடிந்த பின், அனைவரும் அமர்ந்து பேசலாம். ஒரு தெளிவான முடிவுக்கு வரலாம். கட்சிக்காக உழைத்ததற்கு, தக்க பிரதிபலன் கிடைக்கும்.

'சரியான நேரம் வரும் வரை பொறுமையுடன் இருங்கள். பொறுத்தவன் பூமியாள்வான். மேலிடத்தின் மனதிலும் சில முடிவுகள் உள்ளன. பீஹார் தேர்தலுக்கு பின், அனைத்தும் முடிவாகும்' என கூறியதாக தகவல் வெளியாகிஉள்ளது.

கார்கே, சிவகுமார் திடீர் சந்திப்பு, சித்தராமையாவின் வயிற்றில் புளியை கரைத்துள்ளது. தன் பதவிக்கு ஆபத்து வருமோ என்ற கலக்கம் ஏற்பட்டுள்ளது. பதவி பறிபோகுமோ என்ற அச்சத்தில் சில அமைச்சர்களும் உள்ளனர்.