புதுடில்லி:
மத்திய பணியாளர் தேர்வாணையம் (யுபிஎஸ்சி), 2025-ம் ஆண்டுக்கான பொறியியல் சேவைகள் தேர்வின் இறுதி முடிவுகளை வெளியிட்டுள்ளது.

கடந்த ஆண்டு ஆகஸ்டில் நடைபெற்ற எழுத்துத் தேர்வும், அக்டோபர்-நவம்பர் மாதங்களில் நடந்த நேர்முகத் தேர்வும் அடிப்படையாகக் கொண்டு இந்தத் தெரிவுப் பட்டியல் தயாரிக்கப்பட்டுள்ளது.

இதன் மூலம் சிவில், மெக்கானிக்கல், மின்சாரம் மற்றும் மின்னணுவியல் மற்றும் தொலைத்தொடர்பு ஆகிய நான்கு பிரிவுகளில் மொத்தம் 458 பேர் பணி நியமனத்திற்குப் பரிந்துரைக்கப்பட்டுள்ளனர். அரசு அறிவித்த மொத்த காலியிடங்கள் 554 ஆகும். தகுதி மற்றும் விருப்பத்தின் அடிப்படையில் துறைகள் ஒதுக்கப்பட உள்ளன.

மேலும், 102 பேரின் தெரிவு தற்காலிகமாக வைக்கப்பட்டுள்ளதாக யுபிஎஸ்சி தெரிவித்துள்ளது. எதிர்காலத் தேவைகளுக்காக 186 பேர் அடங்கிய ஒருங்கிணைந்த காத்திருப்புப் பட்டியலும் தயாரிக்கப்பட்டுள்ளது. தேர்ச்சி பெற்றவர்களின் மதிப்பெண் பட்டியல் 15 நாட்களுக்குள் யுபிஎஸ்சி இணையதளத்தில் வெளியிடப்படும்.
கூடுதல் விவரங்களுக்கு 011-23385271 என்ற தொலைபேசி எண்ணை தொடர்பு கொள்ளலாம்.