முத்தியால்பேட்டையை சேர்ந்தவரை, டெலிகிராம் மூலம் தொடர்பு கொண்ட மர்ம நபர், ஆன்லைனில் பகுதிநேர வேலையாக வர்த்தகத்தில் முதலீடு செய்து அதிக பண ம் சம்பாதிக்கலாம் என கூறியுள்ளார்.

இதைநம்பி, மர்மநபர் தெரிவித்த ஆன்லைன் வர்த்தகத்தில் பல்வேறு தவணைகளாக ரூ. 4 லட்சத்து 43 ஆயிரத்து 600 முதலீடு செய்துள்ளார். பின், அதன் மூலம் வந்த லாபப்பணத்தை எடுக்க முயன்ற போது, முடியவில்லை. அதன்பிறகே, மோசடி கும்பலிடம் பணத்தை இழந்தது தெரியவந்தது.

இதேபோல், ரெட்டியார் பாளையத்தை சேர்ந்தவர் ஆன்லைன் வர்த்தகத்தில் முதலீடு செய்து 2 லட்சத்து 23 ஆயிரத்து 225, சாரம் பகுதியை சேர்ந்தவர் 67 ஆயிரம், ரெட்டியார்பாளையத்தை சேர்ந்த பெண் குறைந்த வட்டிக்கு லோன் பெற விண்ணப்பித்து ஒரு லட்சத்து 79 ஆயிரத்து 334 என மொத்தம் 4 பேர் மோசடி கும்பலிடம் 9 லட்சத்து 13 ஆயிரத்து 159 ரூபாய் இழந்துள்ளனர்.

இதுகுறித்து சைபர் கிரைம் போலீசார் வழக்குப் பதிந்து விசாரித்து வருகின்றனர்.