கோரிமேடு இன்ஸ்பெக்டர் பாலமுருகன், சப் இன்ஸ்பெக்டர் ரமேஷ், போக்குவரத்து இன்ஸ்பெக்டர் சுரேஷ்பாபு மற்றும் போலீசார் நேற்று முன்தினம் இரவு காமராஜ் சாலை, பாக்கமுடையான்பேட் சந்திப்பு அருகே வாகன சோதனையில் ஈடுபட்டனர்.

அவ்வழியாக பைக்கில் வந்த 2 வாலிபர்கள் போலீசாரை கண்டதும் அதிவேகமாக சென்றனர். அவர்களில் ஒருவரை மடக்கி பிடித்த போலீசார், சந்தேகத்தின் பேரில் சோதனை செய்தபோது, ரூ. 1 லட்சம் மதிப்பிலான 800 கிராம் கஞ்சா பொட்டலங்கள் மறைத்து வைத்திருப்பது தெரியவந்தது.

விசாரணையில், தொண்டமாநத்தம், ஜீவா காம்பிளசை சேர்ந்த கருணாநிதி மகன் ஜான்பீட்டர், 26; என்பதும், பள்ளி, கல்லுாரி மாணவர்கள் மற்றும் இளைஞர்களுக்கு கஞ்சா விற்பனை செய்து வந்ததும் தெரியவந்தது. இதையடுத்து அவரை போலீசார் கைது செய்தனர். அவர் அளித்த தகவலின்பேரில், கஞ்சா சப்ளை செய்த துத்திப்பட்டு, கல்லறை வீதியை சேர்ந்த குறளரசன், 28; என்பவரையும் கைது செய்தனர். அவர்களிடம் இருந்த 800 கிராம் கஞ்சா பொட்டலங்கள், ஒரு பைக், 2 மொபைல் போன்கள் ஆகியவற்றை பறிமுதல் செய்தனர். இருவரையும் கோர்ட்டில் ஆஜர்படுத்தி காலாப்பட்டு சிறையில் அடைத்தனர். மேலும் தப்பியோடிய ராமநாதப்புரத்தை சேர்ந்த மதன்குமார் என்பரை போலீசார் தேடி வருகின்றனர்.