மும்பையில், புரோ கபடி லீக் 12வது சீசனுக்கான வீரர்கள் ஏலம் இரண்டு நாட்களாக நடந்தது. முதல் நாள் ஏலத்தில், ஈரான் வீரர் முகமது ரேசா, ரூ. 2.23 கோடிக்கு குஜராத் அணி வாங்கியது. மொத்தம் 26 பேர் ஒப்பந்தமாகினர்.

நேற்று 2ம் நாள் ஏலம் நடந்தது. இதில் 'ஆல்-ரவுண்டர்' ஆனில் மோகனை, ரூ. 78 லட்சத்திற்கு மும்பை அணி வாங்கியது. தமிழ் தலைவாஸ் அணியில் அலிரேசா கலிலி (ரூ. 30.20 லட்சம்), மோகித் (ரூ. 13 லட்சம்), சுரேஷ் ஜாதவ் (ரூ. 9.50 லட்சம்) ஒப்பந்தம் செய்யப்பட்டனர்.

ஆகாஷ் ஷிண்டே (ரூ. 53.10 லட்சம், பெங்களூரு), உதய் பார்தே (ரூ. 50.10 லட்சம், ஜெய்ப்பூர்), நிதின் ராவல் (ரூ. 50 லட்சம், ஜெய்ப்பூர்), சந்தீப் குமார் (ரூ. 49 லட்சம், மும்பை), குர்தீப் (ரூ. 47.10 லட்சம், புனே) உள்ளிட்டோர் அதிக விலைக்கு வாங்கப்பட்டனர்.

மிகவும் எதிர்பார்க்கப்பட்ட பர்தீப் நார்வல், சாஹில் குலியாவை எந்த ஒரு அணியும் வாங்க முன்வரவில்லை.

மொத்தம் 529 பேர் ஏலத்தில் வந்தனர். இதில் 121 வீரர்கள் பல்வேறு அணிகளில் ஒப்பந்தமாகினர். இதற்காக ரூ. 59.064 கோடி செலவிடப்பட்டது. இதில் புனே அணி, அதிகபட்சமாக ரூ. 5 கோடிக்கு வீரர்களை வாங்கியது.