சென்னை மாநகராட்சிக்கு உட்பட்ட பகுதிகளில், 13.58 லட்சம் சொத்து உரிமையாளர்கள் உள்ளனர். இதில், 2024 - 25ம் நிதியாண்டில், 1,650 கோடி ரூபாய் சொத்து வரி வசூலிக்க, இலக்கு நிர்ணயிக்கப்பட்டு உள்ளது.

இதுவரை, தெற்கு வட்டாரத்தில் 49 சதவீதம், வடக்கு வட்டாரத்தில் 42 சதவீதம், மத்திய வட்டாரத்தில் 41 சதவீதம் என, 503 கோடி ரூபாய் வசூலிக்கப்பட்டு உள்ளது.

அதேபோல், நீண்ட காலமாக சொத்து வரி நிலுவை 565 கோடி ரூபாய் வசூல் பாக்கி இருந்தது. இதில், 102 கோடி ரூபாய் வசூலிக்கப்பட்டு உள்ளது.

அதன்படி, 2024 - 25ம் நிதியாண்டில் இதுவரை, 605 கோடி ரூபாய் சொத்து வரி வசூலிக்கப்பட்டு உள்ளது.

அத்துடன், 2.79 லட்சம் கட்டடங்களில் வரி மாறுபாடு இருப்பது கண்டறியப்பட்டது. குறிப்பாக, கட்டட உரிமையாளர்களிடம் இருந்து சுய விண்ணப்பம் பெற்றும், பலர் கட்டடத்தின் உண்மை பரப்பு, வகைப்பாடு விபரங்களை தெரிவிக்கவில்லை.

இதனால், 'டிரோன்' தொழில்நுட்பத்தை பயன்படுத்தி, வரி மாறுபாடு கணக்கிடப்பட்டு வருகிறது. தனியார் நிறுவனம் வாயிலாக மேற்கொள்ளப்படும் வரி மதிப்பீட்டு பணிகள் முடிவடையும் தருவாயில் இருப்பதாக, மாநகராட்சி தெரிவித்து உள்ளது.

சென்னை மாநகராட்சி அதிகாரிகள் கூறியதாவது:

சென்னை மாநகராட்சியில் ஒவ்வொரு நிதியாண்டில் முதல் 30 நாட்களுக்குள் சொத்து வரி செலுத்துவோருக்கு, 5 சதவீதம் அதிகபட்சம் 5,000 ரூபாய் ஊக்கத்தொகை வழங்கப்படுகிறது.

அதன்படி, ஏப்., 1 முதல் 30ம் தேதி வரையிலும், அக்., 1 முதல் 30ம் தேதி வரையிலும் சொத்து வரி செலுத்துவோர் ஊக்கத்தொகை பெற முடியும்.

குறிப்பிட்ட அரையாண்டின் சொத்து வரியை, முறையாக செலுத்தாதோருக்கு, 1 சதவீத தனி வட்டியுடன் சொத்து வரி செலுத்தும் நிலை ஏற்படுகிறது.

நீண்ட காலமாக சொத்து வரி நிலுவை வைத்திருந்தோரிடம் பல்வேறு வகையில், வசூலிக்கப்பட்டு வருகிறது. குறிப்பாக, அதிக தொகை வைத்திருந்த முதல் 100 பேர் பட்டியல், மாநகராட்சியின் இணையதளத்தில் வெளியிடப்பட்டது.

தவிர, தொடர் நோட்டீஸ் என, பல்வேறு வகையில் அழுத்தம் கொடுத்தன் வாயிலாக, நீண்ட கால சொத்துவரி பாக்கியான 565 கோடி ரூபாயில், 102 கோடி வசூலிக்கப்பட்டு உள்ளது. மீதமுள்ள பாக்கி தொகையை விரைவில் வசூலிக்க நடவடிக்கை எடுக்கப்படும்.

மேலும், 2.79 லட்சம் கட்டடங்களில் மறு மதிப்பீடு பணிகள் நடக்கின்றன. இப்பணிகள் முடியும்பட்சத்தில் கூடுதலாக, 120 கோடி ரூபாய் மாநகராட்சிக்கு வருவாய் கிடைக்கும்.

இவ்வாறு அவர்கள் கூறினர்.

நடப்பு நிதியாண்டில் 1,147 கோடி ரூபாய், நீண்ட கால பாக்கி 463 கோடி ரூபாய் என, 1,610 கோடி ரூபாயை வசூலிக்க, மாநகராட்சி வருவாய் துறையினர் தீவிர நடவடிக்கை எடுத்துள்ளனர்.

- நமது நிருபர் -