கோவை மாவட்டத்தில், 'டாஸ்மாக்' மதுக்கடைகளுக்கு அருகே செயல்படும் மதுக்கூடங்களில் (பார்கள்) சட்ட விரோதமாக மதுபானங்கள் விற்கப்பட்டன. மதியம், 12:00 முதல் இரவு, 10:00 மணி வரை மட்டுமே செயல்பட வேண்டும்.

ஆனால், அதிகாலை, 6:00 மணி முதல் சில இடங்களில், மது விற்பனை ஜோராக நடந்து வருகிறது. 'பார்'களில் இருப்பு வைத்து, கூடுதல் விலைக்கு விற்கப்படுகின்றன.

'பார்'களில் மதுபானங்கள் இருப்பு வைக்கவோ, விற்பனை செய்யவோ கூடாது. இவற்றை கண்காணித்து நடவடிக்கை எடுக்க வேண்டியது, 'டாஸ்மாக்' அதிகாரிகளின் பொறுப்பு. அவர்கள் எந்த நடவடிக்கையும் எடுக்காமல் இருந்தனர்.

விதிமுறையை மீறி செயல்பட்ட 'பார்'கள் தொடர்பாக, 14ம் தேதி நமது நாளிதழில் படங்களுடன் விரிவாக செய்தி வெளியிடப்பட்டது. ஒவ்வொரு படமும் எந்த நேரத்தில் எடுக்கப்பட்டது என்கிற தகவலும் குறிப்பிடப்பட்டிருந்தது. இதைத்தொடர்ந்து, கோவை மாவட்டத்தில் பணிபுரிந்த 'டாஸ்மாக்' அதிகாரிகள் இருவரும் மாற்றப்பட்டுள்ளனர்.

புதிதாக நியமிக்கப்பட்டிருக்கும் அதிகாரிகள், மதுக்கடைகள் மற்றும் 'பார்'களில் நடக்கும் முறைகேடுகளை தடுத்து நிறுத்துவார்களா என்கிற எதிர்பார்ப்பு எழுந்திருக்கிறது.