தர்மபுரி: தமிழர் திருநாளான பொங்கல் பண்டிகையில், நேற்று மாட்டு பொங்கல் வெகு விமர்சையாக கொண்டாடப்பட்டது. மாடு, ஆடு போன்ற கால்நடைகளை வளர்ப்போர் அவற்றை குளிப்பாட்டி, கொம்புகளுக்கு வர்ணம் பூசி, சலங்கை கட்டி மாடுகளை கட்டும் கொட்டகையையும் சுத்தம் செய்து, அலங்கரித்து மாடுகளின் நெற்றியில் திருநீர் மற்றும் குங்குமமிட்டு அலங்கரித்தனர். மேலும் மாடுகளுக்கு மூக்கணாங்கயிறு, தாம்பு கயிறுகளை உள்ளிட்டவற்றை புதிதாக அணிவித்து உழவு பொருட்களை வைத்து வழிபாடு செய்து, மாடுகளுக்கு பொங்கல், வாழைப்பழம் ஆகியவற்றை வழங்கி வழிபட்டனர். விவசாயிகளோடு ஒன்றிணைந்த, கால்நடைகளுக்கான மாட்டு பொங்கல் என்பதால், கிராம பகுதிகளில், மக்கள் அதிகளவில் உற்சாகத்துடன் கொண்டாடினர்.