பழநி நகராட்சி கூட்டம் தலைவர் உமாமகேஸ்வரி (தி.மு.க.,) தலைமையில் நடந்தது. துணைத் தலைவர் கந்தசாமி, நகர்நல அலுவலர் மனோஜ் குமார் முன்னிலை வகித்தனர். கவுன்சிலர்கள் விவாதம்:

தீனதயாளன் (தி.மு.க.,): தைப்பூச விழாவில் ஒத்துழைப்பு அளித்த நகராட்சிக்கு நன்றி. பங்குனி உத்திர திருவிழாவில் வெள்ளி தேர் ஓடும் சன்னிதி வீதியை சரிசெய்ய வேண்டும்.

தலைவர் : பொறியாளருடன் ஆலோசித்து நடவடிக்கை எடுக்கப்படும்.

வீரமணி (தி.மு.க.,): தேவஸ்தான அதிகாரிகளுக்கு நன்றி சொல்வது வீண். இட்டேரி ரோட்டில் தெருவிளக்கு அமைக்க வேண்டும்.

தலைவர் : தெருவிளக்கு அமைக்க நடவடிக்கை எடுக்கப்படும்.

தீனதயாளன் (தி.மு.க.,): பட்ஜெட் தாக்கல் செய்ய வேண்டும்.

கந்தசாமி (மார்க்சிஸ்ட்): மக்களுடன் முதல்வர் திட்டத்தில் வாங்கிய மனுக்கள் இழுத்தடிப்பு செய்யப்படுகிறது.

தலைவர்: மன்றத்தில் வைக்கப்பட்டு குறைகளுக்கு தீர்வு காணப்படும்.

கந்தசாமி (மார்க்சிஸ்ட்): பொதுமக்களுக்கு பயன்படும் கிணற்று நீரை துாய்மை செய்ய வேண்டும்.

தலைவர்: அப்பகுதி மக்கள் கோரிக்கை விடுத்தால் ஆய்வுசெய்து நடவடிக்கை எடுக்கப்படும். உள்நோக்குத்துடன் பேச வேண்டாம்.

கந்தசாமி (மார்க்சிஸ்ட்): உள்நோக்கத்துடன் பேச வில்லை. ராஜா நகர் பூங்காவிற்கு தண்ணீர் தேவை. வரிமாற்றம் செய்யும் விண்ணப்ப நிலை என்ன

தலைவர் : உரிய நடவடிக்கை எடுக்கப்படும்.

காளீஸ்வரி (தி.மு.க.,): ஆதார் பொதுசேவை மைய செயல்பாடைசரிசெய்ய வேண்டும்.

தலைவர் : நடவடிக்கை எடுக்கப்படும்.

முருகேசன் (வி.சி.க.,): வார்டில் சாக்கடையை துார் வார வேண்டும்.

வீரமணி (தி.மு.க.,): இட்டேரி ரோட்டில் உள்ள சாக்கடையை துார்வார வேண்டும்.

தலைவர் : நகரில் மூன்று இடங்களில் சாக்கடை மாற்றி அமைக்க நடவடிக்கை எடுக்கப்படும்.

முருகேசன் (வி.சி.க.,): இறைச்சி வதை கூடங்கள் நிலை என்ன.

நகர்நல அலுவலர்: வதைக்கூடம் தனியாக உள்ளது. மின், தண்ணீர் இணைப்பு வழங்க பட உள்ளது.

சரவணன் (தி.மு.க.,): நகராட்சி குப்பை சேகரிப்பு மையத்தில் சமுக வீரோதிகள் நடமாட்டம் உள்ளது. அதற்கு துணைபுரியும் ஊழியர்கள் மீது நடவடிக்கை எடுக்க வேண்டும்.

சுரேஷ் (தி.மு.க.,): மாரியம்மன் கோயிலில் மாசி திருவிழா நடைபெற்று வருகிறது. அபிஷேகம் செய்ய படும் பால் சாக்கடையில் கலக்கிறது.

நகர்நல அலுவலர்: சோக்பிட் அமைத்து சரிசெய்யப்படும்.

சுரேஷ் (தி.மு.க.,): நகராட்சி கடைகளுக்கு ஒரு ஆண்டு வாடகை முன் பணம் கேட்கப்பட்டுள்ளது. இது குறித்து நகர்மன்றத்திற்கு தெரிவிக்கப்படவில்லை. தன்னிச்சையாக செயல்படுவது ஏற்கத்தக்கதல்ல

தலைவர் : நகராட்சி மூலம் நிறைவேற்றப்படும் புதிய வழிமுறைகள் மன்றத்தில் வைக்கப்பட வேண்டும்.

சுரேஷ் (தி.மு.க.,): பழைய நகராட்சி அலுவலக கட்டடத்தை வருவாய் ஈட்டக்கூடிய அமைப்பாக மாற்ற வேண்டும்.

தலைவர் : வணிக வளாகம் ஆக மாற்ற ஆலோசிக்கப்படும்.

விமலபாண்டியன் (தி.மு.க.,): அடிவாரம் ஆக்கிரமிப்பு அகற்றத்தில் பாதிக்கப்பட்ட சாலையோர வியாபாரிகளுக்கு உதவ வேண்டும்.

தலைவர் : சாலையோர வியாபாரிகளுக்கு உறுதுணையாக எப்போதும் இருப்போம்.

சுரேஷ் (தி.மு.க.,): பஸ் ஸ்டாண்ட் கட்டடம் திறப்பது எப்போது.

தலைவர் : இந்த மாதத்திற்கு பஸ் ஸ்டாண்ட் கட்டடம் நகராட்சியிடம் ஒப்படைக்கப்பட உள்ளது.

செபாஸ்டின் (தி.மு.க): நகராட்சி சொத்து வரி, தண்ணீர் வரி இனங்கள் பாக்கி எவ்வளவு உள்ளது.

தலைவர் : ரூ .ஆறு கோடி வசூல் செய்யப்பட்டுள்ளது. ரூ.11 கோடி நிலுவையில் உள்ளது.

தீனதயாளன் (தி.மு.க.,): தேர்தல் போது பழைய நிலுவை வரிபாக்கி வசூல் செய்ய கட்டாயப்படுத்துவதால் அரசுக்கு அவப்பெயர் ஏற்படுகிறது.

செபாஸ்டின் (தி.மு.க.,): வணிக வளாகத்தின் பரிபாக்கியை 6 மாதத்திற்கு ஒரு முறை வசூல் செய்ய வேண்டும் அவர்களுக்கு நிலுவை வைக்கக்கூடாது.

இவ்வாறு விவாதம் நடந்தது.