ஏற்காடு: சேலத்தை இரண்டாக பிரித்து, ஆத்துாரை புது மாவட்டமாக உருவாக்க உள்ளதாகவும் அதில் ஏற்காட்டை இணைக்க உள்ளதாகவும், சமூக வலைதளங்களில் பரவியது. இதனால் ஏற்காட்டில் உள்ள அனைத்து கட்சி பிரமுகர்கள், அனைத்து இயக்க தலைவர்கள், மகளிர், இளைஞர் அமைப்பினர் இணைந்து, சேலம் மாவட்டத்தில் இருந்து ஏற்காட்டை பிரிக்க எதிர்ப்பு தெரிவித்து, நேற்று கடை அடைப்பு போராட்டம் நடத்துவதாக அறிவித்திருந்தனர். இதற்கு ஆதரவு தெரிவித்து அங்குள்ள, 90 சதவீத கடைகள் மூடப்பட்டன.