விருதுநகர் நகராட்சியில் அவசரக் கூட்டம் நகராட்சி தலைவர் மாதவன் தலைமையில் நடந்தது. கமிஷனர் சுகந்தி, துணைத் தலைவர் தனலட்சுமி, பொறியாளர் எட்வின்பிரைட்ஜோஸ் முன்னிலை வகித்தனர்.

கூட்டத்தில் நடந்த விவாதம்

ராஜ்குமார், காங்.: தனது வார்டு பகுதியில் தோண்டப்பட்ட பள்ளத்தை மூடவில்லை. பாதாள சாக்கடையை சரி செய்யவில்லை.

செல்வரத்னா, தி.மு.க.,: அனைத்துப் பகுதிகளிலும் உள்ள கழிவு நீர் வாறுகாலை துார்வார நடவடிக்கைஎடுக்கப்படும் என தெரிவித்தும் நடவடிக்கை இல்லை.

ஜெயக்குமார், மார்க்சிஸ்ட்: பொறியியல் பிரிவில் தினக்கூலி தொழிலாளர்கள் குறைவாக உள்ளனர். தாமிரபரணி குடிநீர் மோட்டார் இயக்க, பாதாள சாக்கடை அடைப்பு நீக்கும் இயந்திரத்தை இயக்க, மண் அள்ளும் இயந்திரம் இயக்க கூடுதலான பணியாளர்கள் தேவை.

மாதவன், நகராட்சி தலைவர்: 19 தொழிலாளர்களை உடனடியாக சேர்க்க நடவடிக்கை எடுக்கப்படும்.

ஹேமா, தி.மு.க.,: தெரு நாய்களை கட்டுப்படுத்த வேண்டும்.

சுகாதார அலுவலர்: முதற்கட்டமாக 336 தெரு நாய்களுக்கு தடுப்பூசி போடப்பட்டுள்ளது. அடுத்த மாதம் கால்நடைத்துறை மருத்துவர்கள் மூலம் கருத்தடை செய்ய நடவடிக்கை எடுக்கப்படும்.

முத்துலெட்சுமி, சுயேச்சை: எனது வார்டு பகுதியில் குடிநீர் சரியாக வரவில்லை.

கலையரசன், தி.மு.க.,: தனது வார்டு பகுதியில் குடிநீர் குழாய் பதிக்கப்பட்டது. தோண்டப்பட்ட ரோட்டை குடிநீர் வடிகால் வாரிய ஒப்பந்ததாரர் சீரமைக்கவில்லை. இதனால் மக்கள் பாதிக்கப்படுகின்றனர்.

முத்துராமன், தி.மு.க.,: குடிநீர் வடிகால் வாரியத்தினர் நகராட்சியின் அனுமதியின்றி வீட்டு இணைப்பை வழங்குகின்றனர். கடும் நடவடிக்கை எடுக்க வேண்டும். அந்த இணைப்புகளை அடைக்க நடவடிக்கை எடுக்கப்படும் என நகராட்சி தலைவர் பதில் கூறினார். இவ்வாறு விவாதம் நடந்தது.