துணைவேந்தர் வேல்ராஜ் எச்சரிக்கை

'என் பெயரில் போலியான அறிவிப்புகள் வெளிவருகின்றன; அவற்றுக்கு பதில் அளிக்காமல் புகார் அளியுங்கள்' என, அண்ணா பல்கலை துணைவேந்தர் வேல்ராஜ் தெரிவித்துள்ளார்.அவர் வெளியிட்ட அறிக்கை: நான், 'வாட்ஸாப்' செய்தி அனுப்புவது போல, சில மோசடி நபர்கள், போலியான பக்கத்திலிருந்து தகவல்களை அனுப்புகின்றனர். என் பெயர், புகைப்படம், மின்னஞ்சல் முகவரிகளை வைத்து ஏமாற்றுகின்றனர். இதுபோல, என் பெயரில் ஏதாவது தகவல்கள் வந்தால், அதற்கு பதிலளிப்பதற்கு பதில், 'ஸ்கேம், பிராட், பிளாக்' என்று, புகார் அளியுங்கள்.அண்ணா பல்கலையின் இணைப்பு இன்ஜி., கல்லுாரிகளில், போலியான பேராசிரியர்கள் விபரங்கள் வெளியிட்டு ஏமாற்றுவதாகவும் தகவல் வந்துள்ளது. பல்கலையின் போர்ட்டலில், இணைப்பு கல்லுாரிகள், பேராசிரியர்கள் குறித்த விபரங்கள் இணைக்கப்பட்டு உள்ளன.அதனால், தனியார் இணையதளங்களில் உள்ள போலி செய்திகளை கண்டறிந்து, விழிப்புணர்வுடன் இருங்கள். மோசடியில் ஈடுபட்ட பேராசிரியர்களின் மீது கடும் நடவடிக்கை எடுக்கப்படும்.இவ்வாறு வேல்ராஜ் தெரிவித்துள்ளார்.