திருப்பூர் ஏற்றுமதியாளர்கள் சங்க தலைவர் சுப்பிரமணியன் கூறியதாவது:

நாட்டின் அடிப்படை கட்டமைப்பு வசதிகளுக்காக நிதி ஒதுக்கீடு 11.1 சதவீதம் அதிகரித்திருப்பது, கட்டமைப்பு வசதிகளை பலப்படுத்தும்; தொழில் வளர்ச்சிக்கும் உதவிகரமாக இருக்கும். ரயில்வே துறையில் பயணியர் போக்குவரத்து மற்றும் சரக்கு போக்குவரத்தை அதிகரிப்பதற்கான திட்டங்களுடன் கூடிய நிதி உதவி, போக்குவரத்து செலவை குறைக்க உதவியாக இருக்கும்.கார்பன் சமநிலை குறித்த அறிவிப்புகள் வரவேற்கத்தக்கவை.
திருப்பூரை பொறுத்தவரை, கார்பன் சமநிலையை அடைவதற்கான பல்வேறு முயற்சிகள், 20 ஆண்டுகளுக்கு மேலாக நடந்து வருகின்றன. அவற்றுக்கு வலு சேர்க்கும் விதமாக மின் பேருந்துகள் அதிகரிக்கக்கூடிய அறிவிப்புகளை வரவேற்கிறோம்.வரும் காலத்தில் தமிழகத்தில் மிக அதிக அளவு மின் வாகனப் பயன்பாடு அதிகரிக்கும்.'மெட்ரோ' ரயில் திட்டம், நாட்டில் உள்ள பல்வேறு நகரங்களுக்கு விரிவுபடுத்தப்படும் என்று அறிவித்துள்ளனர். கோவையில் மெட்ரோ ரயில் திட்டம் துவங்கப்படாமல் இருப்பதால், அத்திட்டத்தை திருப்பூர் வரை நீட்டிக்க வாய்ப்புள்ளது.இவ்வாறு சுப்பிரமணியன் கூறினார்.