தமிழகத்தில் ஆண்டுதோறும் தமிழ் படங்கள், 200க்கும் மேல் வெளியாகின்றன. மற்ற மொழி படங்கள், 100க்கும் மேல் வெளியாகின்றன. இந்த படங்களுக்கான டிக்கெட் கட்டணத்தில், உள்ளாட்சி அமைப்புகளின் கேளிக்கை வரியாக, 8 சதவீதம் வசூலிக்கப்படுகிறது. இதை குறைக்க வேண்டும் என, திரைத்துறையினர் கோரிக்கை விடுத்து வந்தனர்.

அதை பரிசீலனை செய்த தமிழக அரசு, எட்டு சதவீதம் கேளிக்கை வரியை, நான்கு சதவீதமாக குறைத்து அரசாணை வெளியிட்டுள்ளது. இதற்கு திரைத்துறையினர் வரவேற்பு தெரிவித்து உள்ளனர்.

தியேட்டர் உரிமையாளர் சங்க நிர்வாகி ஸ்ரீதர்: புதிய தமிழ் படங்களுக்கு, தற்போதுள்ள, எட்டு சதவீத உள்ளாட்சி கேளிக்கை வரி, நான்கு சதவீதமாக குறைக்கப்பட்டுள்ளது.

பழைய தமிழ் படங்களுக்கு தற்போதுள்ள ஏழு சதவீத வரி, 3.5 சதவீதமாக குறைக்கப்பட்டுள்ளது. இதற்காக அரசுக்கும், முன்னெடுத்த கமலுக்கும் நன்றி.

தென்னிந்திய நடிகர் சங்கத் தலைவர் நாசர்: தமிழ் திரைத்துறை, சமீப காலமாக எதிர்கொண்டு வரும் மிகக் கடினமான காலகட்டத்தில், இந்த வரி குறைப்பு, தயாரிப்பாளர்களுக்கு பெரும் சுமை குறைப்பாகவும், தொழில்நுட்ப வளர்ச்சியால் மொபைல் போன்களில், செயலிகளில் படங்களை காண பழகி வரும் ரசிகர்களை, தியேட்டர் நோக்கி மீண்டும் அழைத்து வரும் ஒரு நல்ல முகாந்திரமாகவும் அமையும்.