அஜய் தேவ்கனின் திரிஷ்யம் 'தி கன்க்ளூஷன்' படத்தின் டிரைலர் விழா கோவாவில் நடக்கிறது!
மலையாளத்தில் ஜீத்து ஜோசப் இயக்கத்தில் மோகன்லால் நடிப்பில் வெளியான 'திரிஷ்யம்' படத்தின் ஹிந்தி ரீமேக்கின் முதல் இரண்டு பாகங்களிலும் நடித்த அஜய் தேவ்கன், தற்போது 'திரிஷ்யம் தி கன்க்ளூஷன்' என்ற 'திரிஷ்யம்' படத்தின் மூன்றாம் பாகத்திலும் நடித்துள்ளார். அதோடு மலையாளத்தில் 'திரிஷ்யம்' படத்தின் நான்காம் பாகத்தை எடுக்க திட்டமிட்டுள்ள நிலையில், ஹிந்தியில் இதன் மூன்றாவது பாகத்துடன் நிறைவு செய்ய முடிவெடுத்திருப்பதாக இப்படத்தின் இயக்குனர் அபிஷேக் பதக் தெரிவித்துள்ளார்.
அக்டோபர் 2ம் தேதி திரைக்கு வரும் திரிஷ்யம் தி கன்க்ளூஷன் படத்தின் டிரைலர் வெளியீடு செப்டம்பர் 9ம் தேதி அன்று கோவாவில் நடைபெறும் விழாவில் நடைபெறவுள்ளது. ஒரு புதிய போஸ்டரைப் பகிர்ந்து தயாரிப்பாளர்கள் இந்தத் தகவலை அதிகாரப்பூர்வமாக அறிவித்துள்ளனர்.
இந்த மூன்றாவது பாகம் மலையாளப் பதிப்பின் காட்சிகளை அப்படியே பிரதிபலிக்காமல், முற்றிலும் புதிய திரைக்கதையுடன் உருவாக்கப்பட்டுள்ளது. இதன் காரணமாக இப்படத்தின் மீது மிகப்பெரிய எதிர்பார்ப்பு நிலவி வருகிறது, மேலும் இது அஜய் தேவ்கனின் திரைப்படங்களிலேயே மிகப்பெரிய அளவிலான வசூல் தொடக்கத்தைப் பெறும் என்றும் எதிர்பார்க்கப்படுகிறது.
பேனோரமா ஸ்டுடியோஸ் மற்றும் ஸ்டார் ஸ்டுடியோஸ் தயாரிப்பில் உருவாகியுள்ள இந்தக் குற்றவியல் திரில்லர் படத்தில் தபு, ஸ்ரியா சரண், ரஜத் கபூர், ஜெய்தீப் அஹ்லவாத், பிரகாஷ் ராஜ் ஆகியோர் முக்கிய கதாபாத்திரங்களில் நடித்துள்ளனர்.