தாய்லாந்தில், மாற்றுத்திறனாளிகளுக்கான ஆசிய பாரா பாட்மின்டன் சாம்பியன்ஷிப் நடந்தது. பெண்கள் ஒற்றையர் 'எஸ்.யு.5' பிரிவு பைனலில் இந்தியாவின் மணிஷா ராமதாஸ், இரண்டு முறை பாராலிம்பிக்கில் தங்கம் வென்ற சீனாவின் யாங் கியூஜியாவை சந்தித்தார். இதில் மணிஷா 21-18, 17-21, 21-15 என வெற்றி பெற்று, தங்கப்பதக்கத்தை தட்டிச் சென்றார். இது, ஆசிய சாம்பியன்ஷிப் அரங்கில் மணிஷா வென்ற முதல் தங்கம். இப்பிரிவில் மற்றொரு இந்திய வீராங்கனை துளசிமதி வெண்கலம் வென்றார்.

நிதேஷ் 'ஹாட்ரிக்': ஆண்கள் ஒற்றையர் 'எஸ்.எல்.3' பிரிவு பைனலில் இந்தியாவின் நிதேஷ் குமார், இந்தோனேஷியாவின் முஹ் அல் இம்ரான் மோதினர். பாரிஸ் பாரலிம்பிக் சாம்பியன் நிதேஷ் 21-19, 21-12 என வெற்றி பெற்று தங்கம் வென்றார். இது, இம்முறை இவர் கைப்பற்றிய 3வது தங்கம். ஏற்கனவே ஆண்கள் இரட்டையர் (எஸ்.எல்.3 - எஸ்.எல்.4, ஜோடி: சுகந்த் கடம்), கலப்பு இரட்டையரில் (எஸ்.எல்.3 - எஸ்.எல்.5, ஜோடி: துளசிமதி) தங்கம் வென்றிருந்தார்.

மற்ற ஒற்றையர் பிரிவு பைனலில் தோல்வியடைந்த இந்திய வீராங்கனைகளான நித்யா ஸ்ரீ சிவன் (எஸ்.எச்.6), மன்தீப் கவுர் (எஸ்.எல்.3) வெள்ளிப்பதக்கத்தை பெற்றனர். இத்தொடரில் இந்தியாவுக்கு 4 தங்கம், 10 வெள்ளி, 13 வெண்கலம் என, 27 பதக்கம் கிடைத்தது.